BUKALIN

Ivanka Glogović Klarić

Neki dan smo bili va Halubje i strašno san se poveselila kad san va jenoj kuće videla starinsku, lepu vrčinu. Od belega porcelana z glatken rubon, tako da vas ne reže kada sedite na njoj. Ručica finjuje z ornamenton, kot da j' neko pero al grančica. Lepa, cela, a preko šezdeset let stara. Vrčina.

Spametila san se oniste ku san ja razbila kot otrok. Ona j' bila još i na modre rožice – kot ingleški al nemaški porcelan. Ki zna, morda j' i prišla od tamo nekuda kot nonina dota. Potle tega san imela jedan grdi emajlirani bukalin, kega nisan mogla razbit. Hitili smo ga ća kad se j proškujal.

Danas deca imaju plastične vrčinice, ke više ne sliče na bukalini. Miki Mausi, mačkice i se neke sličice su po njih, se neš dečasto, a brižna dečica moraju tako šeriji posal obavjat kad ih posedu na njih.

Ni loše, i kad deca već narastu, imet bukalin va kuće. More vas ćapat išijas, morete nogu zlomit, al pak van se ne da poć va ledeni kondot na kraj koridora...

Verujen da j dosta judi jedan del živjenja prosedelo na bukaline (a neki te morda još!) Ma ste se kad pitali zaš to tako zovemo? Najbliže ča san ja va libreh našla je bil bokal (opet preko talijanskega) i vrč. Sigurno su nekada tu noćnu posudu tako krstili neki ki su voleli jako bumbit.

Voleli su spraznit bokal, bukaletu al vrč al potle tega su napunili vrčinu al bukalin.